【以安全之名：見證共享單車之死】

強制頭盔立法之前因政府換屆而沉寂一時。上星期三 (20/11) 立法會大會，數名議員輪番就單車安全提出質詢，以醫衛界林哲玄為首嘅議員窮追猛打，要求政府立法。運物局長林世雄確認將重推強制頭盔立法，目標明年提交立法會。

係，戴頭盔係可以減少意外傷勢，絕對值得鼓勵。但係咪等同需要立法強制？強制措施對運動單車無乜影響，但對日常單車使用嘅副作用極大，尤其係共享單車，呢點我哋前年文章都講過（https://bit.ly/3Ol82Ca）。澳洲同紐西蘭就係咁：強制頭盔立法後，日常使用單車人數大幅下跌，路上大多只剩運動單車，共享單車想搞都搞唔起。

▌「你戴頭盔咪得囉，安全最緊要啊嘛」

真正單車友善嘅規劃勝在彈性。記得上星期篇文講過改變通勤規律嗎？共享單車係隨心嘅日常事，有時突然想轉踩單車，又或者見小巴等得耐、踩單車仲快。無人會為咗呢個「有時」而隨身攜帶頭盔。

如果真係立法，就唔會再有呢種隨心，我哋又會少咗一個公交以外嘅出行選擇。又或者好多新界人又要焗住犯法，到最後同「騎單車者下車」牌一樣，成為開單收錢嘅財路。然後，唔戴頭盔踩單車就同帶住原罪無分別。即使你無違反交通規則、為自己安全負責，有司機見你無戴頭盔，已經可以擺你上馬討公審。

班官同揸開車嗰班議員，係唔會知成件有幾唔 work，又或者根本就唔care；政府又話喺北都同新發展區推廣單車規劃、單車定位做首尾程接駁嘅？共享單車死咗嘅話，真係好自為之。

▌係咪強制戴頭盔就一天都光哂？

根據政府數字，單車意外死亡或重傷者當中，有戴頭盔嘅佔四成。就如幾個月前喺青衣車禍不幸離世嘅17歲單車少年，一樣有戴頭盔。

頭盔唔係萬能。想根治問題，點解唔從改善和增加單車基建入手，配合對單車使用者同駕駛者雙方嘅教育執法、提升安全意識，從根本上減低車禍風險？

而且，過去三年接近九成單車意外都係輕傷，致命意外只佔 0.3%。更何況近年單車死亡或重傷者數目已顯著下跌，由 2021 年嘅 490 人，銳減至 2023 年 99 人，跌幅達八成咁多。

我明白林醫生醫者父母心，死亡同重傷嘅人絕對一個都嫌多。但點解要以安全之名，為咗極小撮嘅不幸，威脅共享單車嘅生存空間，連同單車作為日常彈性選擇嘅權利都一同抹殺？

咁樣矯枉過正，實在有違公共政策制訂上嘅比例原則。

（p.s. 林哲玄醫生喺無綫新聞同立法會發言均稱，每年單車意外死亡為一百宗，但實情過去七年每年平均只有十宗。我相信林醫生無意誤導大眾，但事實上有。）

文：嚴卓衡